1. Produto ecodeseñado

Descargar en PDF

Para comezar a profundar na Misión #ElijoConsumoResponsable debemos analizar como deberían fabricarse os produtos para ter o mínimo impacto negativo posible, tanto sobre o planeta como sobre as persoas.

Que é un produto ecodeseñado?

Un produto ecodeseñado fabricouse seguindo uns criterios respectuosos co ambiente e as persoas.

Cando falamos de ambiente, referímonos a que non prexudique ao planeta en todo o seu ciclo de vida (desde o seu deseño ata o final da súa vida útil) e cando falamos de persoas, referímonos tanto aos consumidores dese produto, como de todas as persoas que participaron na súa fabricación, respectando as súas condicións laborais, de saúde e seguridade.

Un produto ecodeseñado comeza pola planificación de todas as súas fases, desde a concepción, a súa fabricación e distribución, ata que chega a mans do consumidor; sen esquecer que, cando remata a súa vida útil, o produto debe pasar pola fase de reconversión, e pasa a ser reciclado ou transformado de residuo a novo recurso.

1. Fase de planificación: Na primeira fase, a do deseño, hase de pensar sobre a forma e funcionalidade do produto: modular as partes integrantes para facilitar a reciclaxe das súas partes con maior facilidade, ou intercambiando pezas auxiliares que estendan a vida útil do produto.

2. Fase de fabricación: Na elección das materias primas e os materiais, hase de optar por aqueles que sexan sustentables, innovadores e menos contaminantes, e valorarase a redución ao mínimo da cantidade que se precisa. Durante a súa fabricación, hase de optimizar os recursos enerxéticos que se empregan.

3. Fase de distribución: A loxística de almacenamento e distribución ata o punto de venda debe recorrer a tecnoloxías innovadoras e sustentables que permitan minimizar a súa pegada ou impacto ambiental, coa redución de emisións, o uso de enerxías renovables e menos contaminantes, optimizando as consideracións técnicas das distintas fases de desenvolvemento dun produto.

4. Fase de uso e consumo: O produto adquirido debe ser duradeiro na medida que debe ser usado e consumido, permitindo o seu mantemento e reparación, co fin de ampliar o seu ciclo de vida.

5. Fase de reciclado: Cando o produto finaliza a súa vida útil, entra na fase de reciclaxe e reconversión dos seus materiais, transformando o produto nun recurso aproveitable, reciclable ou biodegradable.

En liñas xerais, este enfoque está relacionado cunha actitude responsable e reflexiva que impacta sobre os modos de consumo actuais, tendo en conta a evolución económica: pasamos dunha economía lineal a unha economía circular.

O que se persegue con isto é impactar o menos posible sobre o planeta, desde a perspectiva dos recursos enerxéticos que se empregan, como do abastecemento dos materiais, sen deixar atrás o impacto que teñen os produtos unha vez empregados, cando se converten en residuos.

Os produtos ecodeseñados procuran, a través destas 5 chaves, conseguir solucións máis beneficiosas para o planeta e que estas redunden no benestar das persoas.