1. Produto ecodeseñado

Descargar en PDF

Para comezar a profundar na Misión #ElijoConsumoResponsable debemos analizar como deberían fabricarse os produtos para ter o mínimo impacto negativo posible, tanto sobre o planeta como sobre as persoas.

Que é un produto ecodeseñado?

Un produto ecodeseñado fabricouse seguindo uns criterios respectuosos co ambiente e as persoas.

Cando falamos de ambiente, referímonos a que contamine o menos posible, a que os materiais cos que está fabricado sexan seguros e sustentables; e cando falamos de persoas, referímonos tanto aos consumidores dese produto, como a todas as persoas que participaron na súa fabricación, respectando as súas condicións laborais, de saúde e seguridade.

Un produto ecodeseñado comeza pola planificación de todas as súas fases: desde a idea e o seu deseño, a elección dos materiais ou materias primas, a súa fabricación e distribución ata o punto de venda, pasando polo mantemento e reparación do produto, ata que remata o seu uso e pasa a transformarse en recurso aproveitable, reciclado ou reciclable.

1. Fase de planificación: Na primeira fase de deseño, reflexiónase sobre a forma e as funcións ou características do produto (pezas que facilitan a reciclaxe, partes ou pezas modulares que estendan a vida útil do produto).

2. Fase de fabricación: A elección das materias primas e os materiais debe ser de orixe sustentable e menos contaminante, valorando a cantidade mínima que se necesite. Alén diso, os recursos enerxéticos que se empreguen deben ser os menos contaminantes e os máis sustentables posible.

3. Fase de distribución: No proceso de almacenamento e distribución, hai que minimizar a pegada ou impacto ambiental dese produto, coa redución de emisións de CO2, ou o uso de enerxías renovables e menos contaminantes.

4. Fase de uso e consumo: O produto, unha vez comprado polo consumidor ou consumidora, debe ser duradeiro e de calidade, asegurando un ciclo de vida que permita o seu mantemento e reparación.

5. Fase de reciclado: Cando o produto xa non serve, entra na fase de reciclaxe e reconversión dos seus materiais, transformándose nun recurso aproveitable, reciclable ou reciclado.

En liñas xerais, este enfoque está relacionado cunha actitude responsable e reflexiva que impacta sobre os modos de consumo actuais, tendo en conta a evolución económica: pasamos dunha economía lineal a unha economía circular.

O que se persegue con isto é impactar o menos posible sobre o planeta, desde a perspectiva dos recursos enerxéticos que se empregan, como do abastecemento dos materiais, sen deixar atrás o impacto que teñen os produtos unha vez usados, cando se converten en residuos.

Os produtos ecodeseñados procuran, a través de estas 5 chaves, conseguir solucións máis beneficiosas para o planeta e que estas redunden no benestar das persoas.