Chaves do produto ecodeseñado

Descargar en PDF

Os produtos ecodeseñados deben seguir unhas pautas que aseguren a súa sustentabilidade e menor impacto, e esas pautas van desde o deseño previo, a súa fabricación, o seu uso, a distribución e venda e, tras o seu ciclo de vida útil, que se asegure a súa correcta reciclaxe.

Alén diso, nós, como consumidores e consumidoras, debemos ter en conta eses factores tanto para coidar o ambiente como para asegurar a sustentabilidade dos recursos e procesos de consumo. Por exemplo, evitando a compra de produtos desbotables, dificilmente reciclables ou daniños para o ambiente.

Por tanto, un produto ecodeseñado deberá seguir estas cinco chaves ou factores no seu deseño, fabricación e distribución:

• Ser seguro, tanto para as persoas como para o planeta.
• Ser duradeiro e reparable, resistente e de calidade.
• Seguir unha produción responsable, tanto para as persoas que o fabrican, como para o planeta.
• Empregar fontes sustentables, tanto na elección das materias primas como no uso de enerxías renovables.
• Contar con funcións e características sustentables, que axuden a reducir o consumo e a ser máis sustentables.

As chaves do produto ecodeseñado

1. Seguro

• Seguro para as persoas: Garante que nin os materiais, nin as materias primas empregadas, afectan á seguridade das persoas, tanto para quen o fabrica como para quen o consome, eliminando, por exemplo, substancias químicas perigosas.
• Seguro para o ambiente: Garante que os residuos non teñen ningún risco para a saúde nin para a contaminación do ambiente.

2. Duradeiro e reparable

• Ciclo de vida e vida útil: Garante que os compoñentes ou as pezas do produto son resistentes e de calidade, asegurando o seu uso continuado e vida útil.
• Facilidade de reparación: Garante que o produto poida ser facilmente reparable, que conte con pezas de reposto para ser reparado polo usuario/a.

O ciclo de vida. Uso, desuso e reuso.

3. Produción responsable

• Reduce o impacto ambiental: Garante que as fases de produción e venda impacten o menos posible no ambiente, por exemplo a utilización de enerxía renovable para a fabricación do produto ou a distribución e venda do mesmo.
• Protexe os dereitos das persoas que participan na súa fabricación: Garante as condicións laborais de quen fabrica e distribúe o produto, así como unhas condicións de produción xustas que contribúen a desenvolver a economía local das zonas onde se fabrican estes produtos.

Vídeos sobre os ODS

4. De fontes sustentables

• Fabricados con recursos enerxéticos non contaminantes: Garante o uso das enerxías renovables e menos contaminantes nas fases de produción e distribución dos produtos.
• Fabricados con materias primas que proveñen de fontes sustentables: Garante que as materias primas son sustentables para garantir o seu abastecemento e mantemento.
• Etiquetado ecolóxico/ambiental: Os selos ambientais garanten a sustentabilidade dos recursos e materias primas empregadas (p. ex.: FSC/PEFC para os produtos forestais como a madeira ou o cartón, OEKO-TEX para o téxtil, etc.)

Os Obxectivos de Desenvolvemento Sostible
Vídeos sobre os ODS
Vídeos sobre os 5R e o desperdicio 0

5. Funcionalidade sustentable

• Produtos de tecnoloxía eficiente: Aqueles produtos que permiten ser máis sustentables, por exemplo adaptadores ou aparellos que axudan a reducir o consumo de auga ou de luz, ou os que permiten producir enerxía renovable no ámbito doméstico, así como aqueles que teñen un baixo consumo enerxético.

Novas etiquetas de eficiencia enerxética (OCU)